密密接job豬籠入水 陳家樂︰望明年做業主

陳家樂、湯怡昨日到馬鞍山為英皇珠寶新店主持開幕，家樂化身「明星店長」，吸引大批市民圍觀。眼見好友湯怡去年榮升業主，他直言心思思想置業，希望明年做業主。

陳家樂自小在馬鞍山長大及讀書，不少親戚及好友都住該區，他笑言︰「佢哋買珠寶可以搵我，應該有折扣。成班好兄弟都係睇住我大。（送首飾畀佢哋？）送唔起呀！」他又笑謂禁止父母來捧場打氣，怕會影響工作，而且覺得好尷尬，但會考慮買首飾送給媽咪。

問家樂可有想過搬出來住？他坦言試過一年，不過負擔太大，最後決定搬回家跟父母同住，他解釋︰「爸爸已退休，煮咗飯又可以陪佢一齊食。」不過，近期密密接job的他，儲下不少積蓄，希望明年可以做業主。

湯怡新居有「男主人」

湯怡自認慳妹，在大半年前已成功置業，家樂雖羨慕，但自言開支很大，「我慣咗揸車，所以比佢（湯怡）嘅支出更大，佢搭港鐵、巴士㗎！」兩人你一言我一語，家樂原本想讚湯怡夠慳家，卻口快快叫她「慳啲啦！」激到湯怡嬲嬲豬。

湯怡實現了在30歲前「上車」的夢想，在將軍澳買了一個兩房單位，早前正式入伙。問到男主人是誰？她即笑言︰「係屋企隻狗仔。」家樂趁機叫湯怡租間房給他，方便他在TVB拍劇，卻遭湯怡一口拒絕︰「我唔想同你傳緋聞！」她最後扳回一仗。

採訪︰Pauline

攝影︰林良明

編輯︰陳禮恒

美術︰梁政敏