見識地獄廚神威力 軒仔帶攞你命三千自救

張敬軒（軒仔）、洪卓立及林德信前晚為《美女廚房》擔任嘉賓，軒仔擔心試食後不適，為了安全離開錄影廠，竟然自備「攞你命三千2018」藥箱自救！

軒仔前晚發揮搞笑本色，逐一介紹「攞你命三千」裝備：「食物夾可以夾腐蝕性食物、銀筷子可以試毒，仲有各地嘅胃藥、止屙藥同埋輻射探測器。」他更特別為洪卓立準備口罩，好讓現場的美女為對方人工呼吸，洪卓立反駁他：「其實人工呼吸可以直接嚟。」軒仔聞言說：「你死喇，要瞓廳。」

軒仔笑稱若「攞你命三千」失效，他也預備了「招魂銅鈴」救醒洪卓立。他說：「因為我哋都係玻璃肚，對不潔食物嘅反應好大。」洪卓立則試過出騷前不幸肚屙，所以前晚主持林盛斌已特別提醒他食定止屙藥，他坦言若見勢色不對，一於罷食保腸胃。

嘲鍾舒漫無味蕾

提到二人心中的「地獄廚神」？洪卓立即笑指是好友鍾舒漫：「有次我哋去新加坡食『撈起』，一嚟已聞到變壞，但鍾舒漫仲瘋狂咁食。佢啲味蕾令佢煮出嚟嘅食物都怪，所以每次去佢屋企，都要買定外賣以防萬一。」軒仔則認為王菀之同樣「有得揮」：「佢依家成日趕返屋企煮飯，不過我從此未見過佢老公！」

撰文︰Pauline

編輯：李潔盈

美術：梁政敏