許廷鏗呻美食太誘惑 欣宜︰唔好嚟搵我

鄭欣宜年前創立自家品牌曲奇餅，一直深受歡迎，平日愛炮製美食宴請朋友的她，竟惹來老友許廷鏗投訴，指她經常用美食引誘。欣宜昨日笑指對方可以不找自己，又提醒他要節食減肥。

欣宜昨天到朗豪坊出席自家曲奇餅店與梳乎蛋Crossover活動，她笑言本身十分喜歡梳乎蛋，今次獲邀與心愛卡通人物合作，令她十分興奮，更設計了三款以蛋為主題的產品。提到老友許廷鏗早前接受訪問時，笑言每當自己做運動，欣宜都以美食引誘他，欣宜聞言笑說︰「唔係淨係整畀佢食，仲有一大班朋友，佢可以唔食㗎嘛！」她笑指對方患氣管敏感，要注意飲食︰「早幾日佢想試我個朱古力甜品，被我阻止咗，佢今個月開騷，要減肥呀！（為對方炮製健康餐？）唔使，佢有專人負責。」

工作忙無暇拍拖

另外，欣宜表示近日工作十分忙碌，豈非沒時間拍拖？她說︰「愛情要嚟嘅時候點都擋唔住，忙係好事，不過我可能老喇，前一晚沖涼想轉身拎洗頭水，唔小心扭傷條頸，要即刻去針灸！」除了工作，她亦忙於家中裝修︰「我屋企住咗九年，所以裝修一下，裝修費唔算平，不過唔係豪裝，當係送畀自己嘅生日禮物，好過買名牌手袋。」

採訪︰Pauline

攝影︰林良明

編輯︰李潔盈

美術︰招潤洪