高海寧撑港姐素顏面試

十年前參選香港小姐的高海寧（高Ling），雖沒得獎，但在娛樂圈發展順利。新一屆港姐競選近日進行面試，大會要求參加者以素顏面試，高Ling大表支持，還說自己都夠膽以素顏現身。

高海寧昨日現身德福廣場，出席《童夢‧迪士尼經典故事遊》揭幕禮，眼見現場多個迪士尼角色巨型裝置，高Ling盡顯童真。提到新一屆港姐面試，夏蕙姨契女林昕雨被指貌似高Ling，她聞言後耍手擰頭表示不似，有網民為她平反，讚高Ling靚好多，她即連聲多謝。

選港姐時一嚿飯

高Ling又稱當年參選時沒有社交網站，不像現在可以Po相，「我以前一嚿飯咁，乜都唔識，依家科技發達，有好身材趁後生展現都係好事。」高Ling認為選香港小姐除外在美，內在美也很重要，最好做回自己，不要對輸贏看得太重，反而經歷才是最寶貴。

今年參賽者被要求以素顏面試港姐，高Ling笑說︰「素顏真係好大挑戰，不過我夠膽㗎，仲後生唔怕，更加可以分辨到真假，港姐好似唔可以整容，素顏就一眼睇清楚晒。」

此外，早前拍攝《C9特工》弄傷後腦及盆骨的她，現時繼續開工，即使有動作戲，只要應付得來都盡量親身上陣。高Ling與馬國明在劇中飾演夫妻，記者笑他們兩人不用打架，但會「打茄輪」（接吻戲），她笑言︰「飾演兩夫妻都會有少少嘅。」

採訪︰Pauline

攝影︰林良明

編輯︰陳禮恒

美術︰梁政敏