同Sammi分散投資 安仔賺錢唔嫌多

許志安昨日出席銀行活動，自言不是精明投資者的安仔，透露與太太鄭秀文（Sammi）會分開理財及投資，他說︰「投資最重要係防止財富貶值，但真正保本就係努力工作。」

安仔昨日出席銀行手機app發布會，與懷孕五個月的司儀宋熙年分享理財之道。安仔自言與Sammi理財方向不同，所以不會交換心得，他笑言︰「我個人進取啲，會投資股票，佢就投資樓多啲，不過呢十幾二十年買樓投資係有較好回報。我買嗰啲股票好穩陣，唔使日日睇住。」問安仔可有試過投資失利而心痛？他說︰「當然有試過，但無得話心痛，又唔係輸晒成副身家，努力啲都搵得番。」

笑表弟個樣似舅父

至於是否搵夠可以退休？自認貪心的安仔笑言不會嫌錢多，只會覺得永遠不夠，他說︰「我喺演藝生涯上仲有好多想追求嘅夢想，所以永不言休，如果唔係就會好悶，人生無晒衝擊。」提到Sammi為另一間銀行拍廣告，兩公婆打正對台，但安仔直言沒有這回事，因大家有不同工作，問到可有想過夫妻檔拍廣告？安仔謂︰「無諗過，亦無人邀請，所以唔使諗。」而剛由加拿大舉行慈善演唱會返港的安仔，透露此行首次與表弟見面，但他笑言︰「我攞飛畀佢嗰陣，諗緊到底佢係表弟定舅父。」

宋熙年要賺奶粉錢

而腹大便便的宋熙年昨日腳踩三吋高踭鞋上陣，剛與老公陳智燊去完毛里裘斯度假返港的她，即擔任司儀賺奶粉綫，她說︰「今次去旅行完全無唔舒服，全程食得又瞓得，返香港之後仲發覺個肚大咗。」

撰文︰倪小珊

編輯︰黃卉彤

美術︰顏玉玲