陳茵媺暫時封肚

三年抱三的陳茵媺（Aimee）日前為有機嬰幼兒食品拍廣告，Aimee跟多名小演員到郊外田園拍攝，問她會否希望跟三位仔女合作？她即耍手擰頭說︰「我會集中唔到！」

Aimee與陳豪已育有二子一女，問她會否再生？她表示短期內未有此打算︰「湊三個小朋友好辛苦，我同阿Mo（陳豪）好多嘢都係親力親為，而且我想做番幕前工作。曾有報道話阿Mo唔想我復出幕前，當然唔係事實，佢知我好鍾意拍嘢，佢願意負責湊小朋友，調轉到佢拍嘢，就由我湊小朋友，我哋係partnership。」