謝安琪人生下半場唔再追B

謝安琪（Kay）女兒張靖快將一歲，這一年來幾乎停下所有工作專心湊女的Kay，得到的回報，就是女兒比較黐媽咪。她又踢爆一直認叻、聲稱一對仔女最黐自己的張繼聰，原來只是「語言偽術」！

Kay昨日出席兒童藝術活動，講到囡囡張靖快將一歲，Kay也覺時間過得很快，「湊得比想像中輕鬆，可能已經有湊囝囝張瞻經驗，同埋個女都算幾易湊，佢兩個月大已經戒咗夜奶，唔使半夜起身餵奶，所以呢一年全職湊囡都唔算捱到好殘。」

提到老公張繼聰閒時在家中喜歡弄女為樂，聲稱個女最黐他，Kay沒有呷醋，更忍不住笑謂︰「係語言『藝』術，最高境界就係自己呃到自己，佢好少喺屋企，佢喺屋企地位就無謂講，但我哋好欣賞佢辛勤工作。」對於阿聰曾認叻表示花了一年時間經營父女情，Kay繼續踢爆老公︰「其實兩個小朋友好鍾意黐我，但佢（阿聰）會吹噓到好似喺屋企好緊要，其實佢係想彌補番心靈空虛。」

老公自己呃自己

被問到可會追多個小朋友？Kay坦言︰「我覺得夠，同小朋友相處係講Quality，依家生活好充實。」Kay的囝囝很疼惜妹妹，亦很喜歡BB，希望媽媽繼續生，Kay笑謂︰「因為佢唔知湊嘅過程，每當有小朋友嚟屋企，佢仲會送玩具收買佢哋。」幸好老公未有提出繼續追B，Kay也揚言「生仔工廠」光榮結業，刻下正為新碟進行錄音，事業上繼續衝刺。

撰文︰Pauline

攝影︰林良明

編輯︰黃卉彤

美術︰梁政敏