TVB新劇曬冷 唐詩詠袁偉豪咀嘴搶鏡

超過60位無綫小生花旦，包括唐詩詠、王浩信、黎耀祥、黃翠如及袁偉豪等，昨日齊集灣仔會展出席影視娛樂博覽，為無綫新劇及綜藝節目造勢。唐詩詠與袁偉豪力谷新劇《棟仁的時光》，兩人失驚無神嘴對嘴接吻，不但令其他藝員譁然，更搶盡風頭。

唐詩詠、袁偉豪昨日在台上介紹新劇時，提到袁偉豪的角色要靠與他人接吻，才能賺取額外時間續命，二人公然來個突襲咀嘴，嚇得身旁的朱晨麗與趙希洛等驚訝擘大口。事後二人表示是公司安排他們即場Kiss，詩詠解釋︰「係珍姐（曾勵珍）諗嘅，因為劇中袁偉豪要錫人去偷時間，我哋都係做番角色，唔敢唔錫。」

袁偉豪笑言跟詩詠在劇中咀戲不多，反而錫了十幾個男人，更笑言被男同事的鬚根「拮親」。其實昨日詩詠舊愛洪永城、袁偉豪女友張寶兒都在場，但袁偉豪笑指女友不能介意︰「開工都無得介意，都已經米已成炊。（女友嫌棄你錫男人？）佢唔知㗎，我拍嗰陣仲未識佢，我返到屋企都會漱口、消毒。」

王浩信唔敢冧莊視帝

另外，王浩信跟楊明齊齊宣傳新劇《兄弟》，提到劇集將於下半年推出，問他可有信心冧莊贏視帝？他笑說︰「隨緣，呢套劇好大挑戰，我個角色好聰明、浮誇，自己都未演過呢類角色。」

撰文︰李潔盈

攝影︰林良明

編輯︰陳禮恒

美術︰梁政敏