陳豪 陳茵媺 暫時3個夠晒數

陳豪和陳茵媺（Aimee）昨日夫妻檔出席新春活動，二人一個舞龍一個揮動龍珠，相當合拍。目前二人育有三個活潑可愛的仔女，陳豪漏口風想生第四胎，Aimee在旁聞言即謂︰「What？！」場面非常搞笑。

昨日是年初七「人日」，陳氏夫婦在場祝大家生日快樂。司儀問二人如何度歲？陳豪說買了一棵靚桃花，Aimee一手包辦團年飯，陳豪則負責蒸糕及沖咖啡。

陳豪表示原本打算出外過年，但為遷就小朋友，所以最終留港，Aimee補充︰「喺香港過年充滿氣氛，其實都好開心。」陳豪就趁機大讚老婆：「一年佢只會入廚兩次，一次聖誕、一次新年。（畀太太嘅美食幾多分？）110分，（有無進步空間？）只會愈做愈好，愈來愈正！」問陳豪會否在新一年再追多個？他還未及回答，Aimee立即說︰「What？」陳豪笑笑口說︰「大家冷靜啲，唔係生唔生嘅問題……」Aimee又望住他謂︰「What do you say？」陳豪傻笑說︰「教育真係唔易，腦力同努力對小孩都好緊要，暫時三個先啦，首先做咗仔女啲功課先，哈哈！」

夫妻拍親熱戲唔尷尬

去年復出拍電影的Aimee透露，稍後會拍廣告和出席活動為主，亦有可能同老公一齊演出，陳豪笑指難以避免夫妻檔，Aimee覺得若果真實夫妻演感情戲可能太真！此時，陳豪突然說︰「唔好閂咗後門，睇完劇本再決定。」問到倘若夫妻在鏡頭前親熱又會否尷尬？他笑謂︰「夫婦嘛，有乜好尷尬。」

採訪︰Pauline

編輯︰林梓添

美術︰李明