新劇造型被嫌猥瑣 洪永城開工搣甩二撇雞

洪永城（Tony）和黃心穎昨日在電視城的古裝街拍攝《丫鬟大聯盟》，早前試造型時，他的「二撇雞」扮相惹來不少負評，結果在正式開工，「二撇雞」不再，Tony回復青靚白淨現身。

洪永城昨日開工被發現「二撇雞」造型不見了，他解釋謂︰「收集咗大家意見後，覺得無鬚係好睇啲，大家睇完都覺得正經啲。（係咪覺得無咁鹹濕？）我唔用鹹濕介定呢件事，《張保仔》都有鬚啦，嗰種係粗獷，我可以做到粗獷啲，但『二撇雞』暫時唔係好接受到，劉松仁當年嘅《陸小鳳》就得。」他坦言無鬚比較舒服，也不怕對手見到自己忍不到笑。

提到日前與黃翠如到日本拍廣告，翠如曾笑指他做「大叔」，Tony說︰「佢話我係擾民嘅阿叔，我企喺佢面前，佢就覺得我擾亂緊佢，但我喺佢身邊就好自在。」當問到農曆新年會否到前女友唐詩詠家中拜年？他肯定地說︰「應該都唔會。（同佢慶祝咗攞視后？）未有機會，真係要睇時間先可以做得到。」

心穎自爆遊法國被靚仔搭訕

另外，黃心穎對於Tony沒有了「二撇雞」表示無所謂。「我覺得幾新鮮，我又唔覺得佢留鬚個樣鹹濕，出到個角色性格就得啦。」心穎又稱Tony會於戲中調戲她。問到現實中可曾被人調戲？她說︰「我以前去法國旅行試過畀人搭訕。嗰時有少少尷尬，但對方幾靚仔，呢個經歷都幾有趣。」

撰文︰Pauline

編輯：林梓添

美術：梁政敏