首度進軍紅館 趙學而請王傑做嘉賓

趙學而去年在九展開騷，反應超乎想像般好，今年她於4月28日轉戰首度踏足的紅館舞台，雖然暫時只演一場，但為了專心做準備，她將內部認購交由老公全權負責。

趙學而昨日在記招上，提到能夠圓夢在紅館開騷，心情十分緊張。「始終去到咁大嘅舞台，要將自己夢想無限擴大，以有限資源去做，其實比較困難。」

不過，她最開心的是，好多朋友知道她開騷都說要去捧場，她笑言︰「最好梗係梁朝偉、周潤發嚟啦！」學而透露已邀請王傑做嘉賓。「當年佢喺音樂上幫咗我一把，之後佢去咗內地發展，我哋都有接觸過，自從去年佢宣布退出後，好多人搵佢演出，個期排到2018，所以少少擔心佢做唔到我個騷。」

唱一場貴精不貴多

去年九展開兩場火速爆滿，今次只開一場可擔心門票供不應求？學而表示加場與否仍是未知之數，不過她反而着重貴精不貴多。問到老公會否上台？她笑言︰「佢唔識講嘢，全程喺台下乖乖睇騷就夠，幫我招呼朋友。不過佢好醒，都知道要畀多啲時間我休息，所以乜都攬晒上身，親朋戚友訂飛全部佢搞掂。」

問學而個唱服裝會否性感？她說可能有，那會着比堅尼？她笑言︰「咁瘦嘅人着出嚟都嚇一跳啦，我會努力增肥，會操肌，綫條睇起嚟會靚啲。」

採訪︰Pauline

攝影︰林良明

編輯：林梓添

美術：梁政敏