媽咪家姐遊日蕩失路 心穎叫馬明下次做司機

黃心穎前晚在網上大呻被媽媽及三位靚靚家姐撇低去旅行，她昨日跟森美出席TVB活動時，笑言家人去旅行經常無預她，但下次會邀請男友馬國明同行，順便做司機。

黃家向來一門四美，除了心穎BB外，三位家姐心美、心妙及心慧均外貌標致。日前三位姐姐帶黃媽媽去日本旅行，心妙更將浸溫泉相放上網，黃媽媽保養得宜，獲網民大讚她是美魔女。心穎鬼馬回應︰「係呀，媽咪生咗幾個仲咁好身材，佢鍾意跳舞，以前我哋母女喺加拿大同台表演。」

心穎BB昨日出席《big big channel Kids Talk》記招時，笑說︰「佢哋去旅行，已經唔係第一次無我份，最搞笑佢哋蕩失路，要敲人哋屋企門，求人車佢哋去目的地。我話因為無咗我所以miss咗條路，點知家姐話有我喺度會miss埋班機。」

幫手搬行李

問她下次會否邀請馬明參與黃家旅行，順便幫手搬行李？心穎笑說︰「咁大件事？可以考慮做埋司機。不過首先要叫爸爸同遊，因他今次無去。」

撰文︰李潔盈

編輯︰陳禮恒

美術︰招潤洪