衛蘭開騷唔減磅

衛蘭昨日到商台宣傳明年初舉行的紅館演唱會，她表示今次個唱跟以往有別，就是不會刻意減肥：「因為上次演唱會減咗十磅，但成個過程都唔Enjoy！」

衛蘭提到過往地獄式減肥時，她直言︰「當時唔食澱粉質，個人好down，試過一邊跑步一邊喊。所以我同自己講，今次唔可以再咁唔健康。」她又表示已準備好個唱歌衫，問她不減肥會否擔心觀眾負評？她即笑說︰「所以企上台係要有勇氣，可能會唧咗啲肉出嚟，到時我會帶出我最靚嘅地方，就係條頸。」

距離開騷不足一個月，她笑言個唱仍有很多東西未準備好︰「以前嘅演唱會都係搞掂啲歌先，但今次反而先安排好服裝、舞台，最近才開始排舞，但之後要出席頒獎禮，都無乜時間排練。」

平常心爭女歌手獎

提到各大樂壇頒獎禮相繼舉行，衛蘭表示會出席三個頒獎禮，有指她將會首度奪得叱咤女歌手金獎，她說︰「我覺得唔會，入到五強已經好開心，順其自然啦，攞唔到都唔緊要。」提到容祖兒、李克勤也睇好她得獎，衛蘭續稱︰「我覺得一定唔會，有佢哋睇得起我，已經好足夠、好感恩。」

撰文︰李潔盈

編輯︰陳禮恒

美術︰梁政敏