柏豪賽車撞欄 自嘲犯太歲

周柏豪、連詩雅、莊思敏、錢嘉樂和老婆湯盈盈等昨日在中環出席《Formula E電動方程式賽車》活動，首次落場的周柏豪大呼過足癮，但過程中發生小意外，柏豪在掟彎時撞到圍欄，幸好人無事。

周柏豪昨日有份落場興奮得高呼夢想成真︰「發夢都無諗過可以喺香港嘅街上面玩賽車，細個玩賽車遊戲就玩得多，真賽車都係近幾年先開始接觸，有時都會同班朋友去珠海練車。（太太可有叮囑你小心駕駛？）永遠出門口都會叫我小心啲，我會同佢講玩下啫，我就玩乜都好節制。」柏豪又說因為今年犯太歲，所以一直放了護身符在銀包。不過，他之後比賽時到第三個彎就撞到防撞欄，事後柏豪表示慶幸沒有撞到其他車，也沒有阻住賽道。「可以自己揸車返嚟，唔使人哋車我。賽車手永遠都係咁講。」

上年有份落場的莊思敏，因為今年取消了房車賽事，所以她只能做觀眾，她謂平時都有去珠海練賽車，問她駕車技術是否好辣？她笑謂︰「係安全，反而賽車嘅人落到場會更加小心，知道咩情況下好易發生意外。」

莊思敏恨有姻緣

莊思敏又透露最近忙為《溏心風暴3》宣傳，亦會主持一個新春的玄學節目，問她會否趁機問姻緣？她笑言︰「當然啦，我次次做節目都會問，個個師傅都叫我等下啦。」在《溏心3》中飾演許二太的她，被觀眾讚賞演得夠奸，她說︰「好開心大家鍾意許二太呢個角色，就算出街有人鬧都無所謂。」

撰文︰Pauline

編輯：林梓添

美術：招潤洪