《溏心風暴3》雀局 李司棋自認「站長」

劇集《溏心風暴3》演員夏雨、李司棋、米雪、關菊英前晚在big big channel《明星麻雀王大賽》攻打四方城。夏雨表示從前經常與何守信打衞生麻將，自認高手的他更揶揄李司棋是「魚腩」，不過，司棋姐竟自認「站長」，經常在麻將枱上瞌眼瞓，連帶其他人都覺得悶。

自稱九歲已經打麻將的米雪卻謙稱牌技不好，偶爾食糊全靠一招「盲拳打死老師傅」。關菊英則自爆是雀林高手，試過連續打20小時。「近年打少咗，唔係鼓吹賭博，只係覺得打麻將可以訓練腦筋，唔會咁快退化，可以唔玩錢，當遊戲咁玩。」