十指緊扣開工 陳豪man爆護妻

陳茵媺（Aimee）去年產女後，最近正式投入工作客串演出電影，昨日與老公陳豪（阿Mo）十指緊扣現身Tiffany腕錶活動。陳豪為免愛妻辛勞，當眾拍心口說辛苦的工作由他來做，逗得Aimee開懷甜笑。

陳豪和陳茵媺兩公婆很久沒有一齊出席公開活動，提到Aimee早前正式復工拍電影《日月星》，陳豪笑謂愛妻出來工作都是好事，不過兩人早有共識，盡量不會同時間工作，不會丟低三個寶貝仔女。而昨日一齊出席活動，三個孩子就交由家人照顧，Aimee說︰「雖然每次開工都會唔捨得小朋友，但實在太鍾意演戲，所以復工都無唔慣，反而相當享受。」

唔畀Aimee拍劇免辛苦

那他們會否夫妻檔拍電影或拍劇？阿Mo說︰「拍劇就暫時唔會喇，小朋友唔見爹哋三、四個月就得啫，唔見媽咪太耐就唔掂，如果父母一齊唔見咗就更大件事，呢啲辛苦嘢，我捱！」

談到阿Mo曾暗示想生第四個，Aimee聞言後即反問︰「吓？你幾時咁講？」阿Mo解釋當日只是記者問他會否絕育︰「絕育手術梗係Da me（日文：不要）啦！生唔生是另一件事，就算生都唔會係呢幾年，等三個細路大啲先諗。」

同場還有以藝人身份出現的薛世恒，他透露目前有接電影和電視的工作，但詳情未能透露。問到可介意與「前妻」陳法拉合作？他大方表示要視乎法拉意願。

採訪︰Pauline

編輯：林梓添

設計：梁政敏