Fans接受師兄祖兒開心

容祖兒昨日在將軍澳舉行《My Secret Live》演唱會DVD簽唱會，跟歌迷投入玩唇印遊戲。期間有男歌迷不敢親吻照片上的祖兒嘴唇，他表示要留給祖兒男友劉浩龍（師兄），𠱁得祖兒甜笑不已。

祖兒昨日在台上邀請幾位歌迷玩遊戲，准許他們狂咀她的玉照。當中一位男歌迷相當識做，全程不敢錫錫相中的祖兒嘴唇，更搞笑說︰「呢個部位咁神聖，當然要留畀師兄！」祖兒聞言即笑說︰「有刺客，拖佢出去！」最後更選中該男歌迷勝出。

事後祖兒受訪，提到歌迷十分接受師兄時甜笑說︰「唔係咁點啫，成日見到我哋一齊，唔講佢（師兄）講邊個，咁都好，都開心嘅。」

唔敢同阿Sa鬥瘦

提到今次DVD收錄音樂會中她喜愛的非大熱作品。「我做呢個騷純為興趣，但下次唔可以咁樣，因為維持唔到生計。我努力咗18年，先換來一個理想同興趣，下次我哋應該紅館見啦。」

另外，提到早前祖兒跟蔡卓妍（阿Sa）往杜拜工作，她大讚阿Sa是最佳旅伴，可以不停又食又買。「不過阿Sa食量好大，但一啲肚腩都無，我問佢食咗啲嘢去晒邊，佢都話唔知！」她指阿Sa在網上發布三點式相，原來她當時正在身旁。「我強烈要求佢喺張相裁走我，唔好放我入去，因為企喺佢隔籬，我肥到似豬咁。」

撰文︰李潔盈

編輯︰林梓添

設計：梁政敏