新婚翌日即開工 孫耀威呻飲醉無洞房

孫耀威前日與陳美詩（Macy）舉行婚禮，昨日便立即復工出席醫學美容活動。不過戴上黑超的他明顯宿醉未醒。「我好渣，凌晨12點已經被朋友隊冧咗，我開頭諗住扮醉，點知真係醉。」

孫耀威笑指老婆陳美詩酒量很好，與一眾姊妹傾偈傾天光，相反自己醉得不省人事，結果特地預訂了有大床的酒店套房也得物無所用。「我醉到大字形瞓喺大床度，無得洞房，嘥咗！」

婚禮曬500萬行頭

提到婚後翌日立即復工，他自言已成家立室，要努力賺錢養老婆。「不過老婆話婚後以事業為重，佢就快出新歌，做2017年女新人。幾廿歲先做新人，我希望佢成功，咁我可以食下軟飯。」他指最緊要太太開心，做甚麼也會支持︰「佢好鍾意演藝事業，個個都催我哋生B，不過夜晚做啫，日頭可以工作。（怕唔怕老婆太操勞影響生B？）呢度（美容中心）有無壯陽服務？我會努力。」

二人前日在香港佑寧堂舉行婚禮，一身行頭十分矚目。新娘子陳美詩穿上象牙白喱士魚尾婚紗，配上鑽飾品牌Darry Ring的500萬鑽石首飾，包括三卡鑽石頸鏈及三卡閃爆鑽戒，一身復古造型甚有仙氣。至於孫耀威的新郎造型甚有特色，原來一身紫色鴛鴦格仔禮服出自他的自家品牌TUXEE，更是新郎哥親自設計，相當前衞。

撰文︰李潔盈

攝影（部分）︰林良明

編輯︰林梓添

設計︰梁政敏