年底連環開騷 楊千嬅最煩還飛債

劉德華因傷關係，早前宣布取消年底紅館騷，騰出的檔期迅即成為眾歌手的肥豬肉，楊千嬅將會是其中一位「攝期」歌手。不過，千嬅在紅館開騷前，就答應商台演出拉闊音樂會作為熱身。

楊千嬅昨日到商台出席拉闊音樂會記者會，宣布11月7日假會展舉行，千嬅入行前任職護士，席上被問到要是當年沒有參加新秀，今天會做甚麼工作？千嬅表示︰「可能繼續任職護士，或者結咗婚，仲生咗三個小朋友，如果唔係咁忙，要我對住30個小朋友都仲得。」

未定嘉賓名單

談到今次拉闊的演出，千嬅表示會邀請一班聽她歌曲成長的歌手擔任嘉賓，但名單仍未落實，不過笑言一定有男有女。「我都想聽下男聲唱《少女的祈禱》係咩感覺。」千嬅表示已知道老公在上海的親友想換飛，現在距離開騷還有三個多月，但她已孭下一身飛債，不過千嬅指今次音樂會都算是為年底紅館演唱會作序幕。她又強調並非執劉德華二攤，事實上公司也有入紙待批，另外亦有其他人分拆檔期。

早前千嬅聯同幾位朋友到日本旅行，期間吃拉麵時收到通知已成功申請紅館檔期，千嬅二話不說立刻Order多碗拉麵，問她是否慶祝？她笑言︰「因為知道返港要減肥，所以食定多碗呀！點知返到嚟有記者朋友問我係咪有咗，我話如果以我呢啲高齡產婦有咗，一定大鑼大鼓啦。」

撰文︰Pauline

編輯：林梓添

設計：梁政敏