產後減廿磅 吳若希年底簽紙結婚

吳若希（Jinny）昨日產後首度出席公開活動，吸引過百歌迷撑場，早前與網民隔空罵戰的Jinny默認EQ低。至於這次產後「復出作」，亮相半小時火速吸金六位數，力證她的一姐地位穩如泰山。

成功在產後個多月勁減20磅的吳若希昨日出席商場活動，穿上「封胸」連身裙十分密實，她笑言︰「留番畀個女嘛！」她表示囡囡淼淼早上餵人奶、晚上食奶粉，肥嘟嘟相當可愛。Jinny坦言昨日由澳門坐船來港，已不停翻睇女兒相片以解相思之苦，待完成工作後會立刻返澳門陪女兒。她又說男友在家照顧囡囡，餵奶、沖涼、換片全部難不到他。

談到她停工期間，師妹菊梓喬氣勢相當強勁，問Jinny可擔心一姐地位受到動搖？她說已聽過菊梓喬的歌，覺得她唱得很好聽，Jinny笑言︰「我從來唔係一姐，從來都係阿妹。」她又透露老闆何哲圖已準備新歌給她。問她會否考慮追多個B？她坦言已計劃第二胎追個仔，第三胎就想生孖B。

否認婆媳不和

在淼淼出世後，Jinny和男友Alex一直不讓囡囡容貌曝光，偏偏男友的友人卻上載她女兒的照片，引發Jinny和網民展開罵戰，她重提此事不禁傻笑︰「依家諗返起覺得自己好傻，當時自己都喊咗成日連嘢都無食。未來奶奶返澳門都有探我，仲煲湯畀我飲又叫我唔好唔開心，叫我望住BB要開開心心。」再問到與男友幾時結婚，她說︰「會在今年底先註冊，儀式上嘅事應該明年初在外地進行。」

採訪︰Pauline

編輯︰林梓添

設計︰梁政敏