舞台劇圓滿落幕 葉童晚晚向志雲抽水

陳志雲（Stephen）、葉童、王喜及胡諾言等主演的舞台劇《雷雨对日出》，前晚於新光戲院圓滿結束。除了Stephen在劇中要掌摑王喜，葉童又要大力拉扯志雲，眾人演出非常投入，觀眾反應甚佳。

一眾演員前晚出席慶功宴，陳志雲透露為免在演出期間傷風感冒，決心戒口多天，他笑言︰「今晚可以盡情咁食，其實有場戲講我死咗，但忽然喉嚨好痕，幾驚頂唔住咳咗出嚟，好彩最後都捱過咗。」

摑王喜唔夠響

葉童表示今次為舞台劇排了三個月，覺得自己在同日演出日、夜場的表現最好。劇中她演的兩個角色都被男人拋棄，笑言頓時令她覺得老公陳國熹是最好。陳志雲與王喜希望有機會巡迴演出，葉童回應︰「我做人好睇眼前，做完呢七場已經好犀利，如果有咁嘅緣份我都會參與。」對於陳志雲「投訴」遭她很大力拉扯，差點把戲服扯爛，擔心下一場無衫着，葉童聞言笑說︰「無啲咁嘅事，但我有摸佢籮柚。（質感如何？）幾好吖，軟綿綿！劇本本來安排我大叫，但我覺得扯衫在視覺上會更強烈，我見效果幾好就繼續。」

此外，志雲在劇中掌摑王喜的臉，他笑指有觀眾投訴在掌摑王喜時沒有聲響，兩人在慶功宴即場重演一次。志雲表示︰「本身係專業演員，而且計過度過先摑佢塊面。」但他又自爆王喜即興加插踩他膊頭的戲，志雲稱︰「按摩師噚日都問我膊頭咩事。」

撰文︰Pauline

編輯：陳禮恒

設計：梁政敏