「生煎王」曬愛的紋身 江若琳冧爆等嫁

前組合Bliss成員蕭潤邦（Oscar），近年積極進軍飲食界，打理的生煎包店昨日在大埔開第三間分店，女友江若琳（Elanne）、蕭媽媽及好友何遠東親身到場支持，Elanne更儼如老闆娘般在店內招呼朋友。

今次是Oscar和Elanne公開戀情後首度同場見傳媒，二人拍拖日子雖短，但Oscar似乎已認定Elanne為結婚對象，在左手手腕紋上「E」字作愛的紋身。問到可擔心蕭媽媽呷醋？他醒目地說︰「媽咪已經『紋』咗喺心入面。」對於紋身「E」字上的皇冠，他就說視女友如女王般，Elanne也忍不住讚男友浪漫。不過之後她用紋身來開玩笑︰「佢之後搵番個都係E字（英文名）開始咪得囉，好似Evelyn、Eva。」Oscar則開玩笑說可以搵個叫Eddie的男生。

獲未來奶奶大讚

另外，談到生煎包店已開到第三間分店，Oscar指趁着近日租金回落，計劃在銅鑼灣開第四間分店，同時着手籌備年底在荃灣再開分店。有指Elanne「旺夫」，女友可有入股？他們稱二人工作分得很開，記者提議二人可合作推出「夫妻肺片」，Oscar即搞爛gag說︰「好喎，我鍾意食辣，講嘢又夠廢。」問到幾時求婚？Oscar稱到時會通知大家，Elanne則表示沒幻想過求婚過程，但相信男友會製造驚喜。談到未來奶奶都在場，Elanne稱與蕭媽媽經常見面，Oscar則表示媽咪讚女友又靚、又好又孝順。

採訪︰Pauline

編輯︰林梓添

設計︰梁政敏