古仔孭40磅開工呼吸困難

古天樂（古仔）和劉青雲主演耗資三億製作費的新片《明日戰記》，經過近四個月拍攝後，內地取景部分終於煞青。攝製隊將於八月在港繼續拍攝，古仔透露還有兩位影帝及影后加入。

除了演員分量重，就連他們的戲服也很重秤，輕則穿皮褸，重則如古仔和青雲身上的30幾磅裝甲，因此當完成內地戲份，眾演員都鬆一口氣。古仔說︰「呢件戲服裝束，對我嚟講係一個體能挑戰，表面重量超過卅磅，但着咗上身後，加埋汗水，至少40磅重，又壓住個肺，加上室內拍攝，喺空氣稀少下開工，好多時都有一種難以呼吸感覺，所以我成日飲凍水解渴，仲有兩支特製冷氣喉散熱。」