【取代周柏豪】 傳許廷鏗落實簽華納做一哥

日前約滿無綫星夢娛樂的許廷鏗（Alfred），近日盛傳加盟華納旗下，至昨日有傳Alfred已正式動筆簽約，過檔華納頂替周柏豪做一哥，不少粉絲獲悉後大表支持，揚言偶像去哪裏落腳都會撑到底。

由無綫一手捧紅的Alfred，有指已於四月底回復自由身，由於不再續約星夢，故即時被無綫放入「雪櫃」，就連其冠軍歌《痛醒》亦被Out出《2017勁歌金曲優秀選第一回》候選歌名單上，歌唱事業全面叫停。不過Alfred並沒有手停口停，皆因他是註冊牙醫，所以就算暫停歌唱事業，亦可以專注牙醫服務，這點絕對有優勢。

趁後生跳槽

其實Alfred一直以來都有不少唱片公司向他招手，但華納開出的條件豐厚，所以他甚為心動，而且雙方一直傾得極為順利，但加盟一事就只聞樓梯響，因為有傳Alfred一度想自組公司，只將歌曲交由華納發行，所以一直拖拉至今；不過，有傳近日Alfred終下定決心動筆簽約，就連經理人合約亦簽給華納，正式成為「華納一哥」。

雖然Alfred在無綫期間名利雙收，但正所謂「魚唔過塘唔會肥」，Alfred這次過檔的決定亦有不少粉絲一面倒支持，「走得好，趁後生去見識多啲呢個世界」、「撑到底，繼續唱多啲好歌畀大家聽」、「後生唔跳槽等幾時」。

撰文︰Pat

編輯︰黃寶恩

設計︰梁政敏