個唱尾場 周柏豪含淚感言冧愛妻

周柏豪一連三場在紅館的個唱於前晚落幕，蔡卓妍（阿Sa）和艾粒為柏豪擔任尾場嘉賓，而整晚的感動位，當然不少得新婚不久的周太Stephanie在後台落力打點之餘，柏豪更自爆為了今次個唱幾乎結不成婚，他一時感觸含淚表示感激。

周柏豪一連三場演唱會前晚舉行尾場，由阿Sa擔任壓軸表演嘉賓，柏豪與阿Sa玩到好high之餘，他也不忘多謝對方︰「呢啲真係朋友，我打個電話畀佢，佢就畀個期我。」阿Sa直認不諱來做嘉賓，目的是宣傳她和柏豪的新片《原諒他77次》。到握手環節，柏豪見到有懷孕歌迷走近台邊，立刻飛撲上前叫大家讓路，又為孕婦送上祝福，冧爆全場fans。至於另一對嘉賓艾粒，柏豪自爆當時剛出道，少爺占就搵他做MV男主角。

柏豪在台上多謝老婆Stephanie，自爆去年結婚時，因為忙於籌備個唱，所以老婆要獨自搞婚禮。柏豪更眼濕濕稱到婚禮當日，在行禮前十分鐘發現有記者，老婆反問他是否要取消婚禮，對於老婆事事以他為中心，令柏豪大受感動。

衝刺期暫不生B

到後台做訪問時，柏豪指其實想開多幾場。「覺得自己仲有貨，開多幾場都無問題，不過真係無期，或者裝備下自己先。（會唔會開Part 2？）暫時未有打算，不過下個月就開始巡迴。」為了今次個唱，至今仍無暇去度蜜月，巡唱是否可以帶埋老婆同行？柏豪笑謂︰「都好喎，返大陸度蜜月。」老婆對他的個唱有何評價？他說︰「覺得我唱歌穩定咗同埋自信多咗，或者同我年紀大咗有關啦。」開完騷是否有時間造人？柏豪直認與老婆都好喜歡小朋友，大家也有這個計劃，不過未來幾年是衝刺期，他們都想先過二人世界再打算。

撰文︰Pauline

編輯：林梓添

設計：梁政敏