孫慧雪揚言 產前拍少女寫真

去年底下嫁富二代男友Edwin Lo的「宅男女神」孫慧雪，早前宣布懷孕後逐步減少工作量以迎接BB的來臨。昨日雪雪陀住五個月巨肚現身劇集《不懂撒嬌的女人》宣傳，她未有透露BB性別，但就預告會在產前拍攝一輯充滿少女風的大肚相留念。

孫慧雪昨日透露已肥了20多磅，她表示︰「醫生估計BB係大B，條腰好肥，腳好長。（你上圍可有升cup？）唔知實際幾多，不過胸圍已經換咗幾次，背脊都好多肉呀！」問她會否影大肚寫真？她笑言︰「估唔到日前上載嘅新相咁大回響，我之後都打算影大肚寫真，走優雅少女風，一定要喺女人身材最好嘅時候留紀念。」問到胎兒性別，雪雪表示與老公都希望有驚喜，而BB用品亦以中性用品為主。她已計劃產後盡快復工，事關現在每日留在家中實在太悶。

唐詩詠同王浩信咀不停

唐詩詠在劇中與王浩信不停咀，笑言一個鐘咀幾次，她的角色是由不懂撒嬌到學會撒嬌，問到現實中可有向男友洪永城撒嬌？她說︰「每個女仔都會撒嬌，只要男友唔好激我哋，開心時自然會撒嬌。（洪永城係咪受呢一套？）咁就要問佢啦。」另外，談到日前撇甩洪永城，跟馬國明一起睇《風雲5D音樂劇》，詩詠解釋那是一班兄弟姊妹去支持鄭嘉穎，她沒好氣謂︰「唔好講到我同馬明私下出街好似有問題咁先得㗎！（無預洪永城？）門票由嘉穎安排，一票難求㗎！」

採訪︰Pauline

攝影︰林良明

編輯︰林梓添

設計︰梁政敏