誕6磅大眼B仔 Miki順產唔覺痛

32歲前「餅女」楊愛瑾（Miki）昨日在IG宣布，上月30日為老公郭永淳誕下囝囝，更取乳名LuLu。順產的Miki表示，囝囝比預產期提早兩星期出世，所以出生時未夠六磅，幸好身體十分健康，一雙大眼更相當精靈。

新任媽媽Miki昨日公開一家三口合照，相中Miki雖然素顏，但相當精神；老公郭永淳單手抱住LuLu，而小LuLu眼大大相當靚仔，靚樣盡得父母遺傳。Miki受訪時開心說︰「BB一出世就已經眼仔碌碌周圍望，好似想快啲見到我哋咁。」她表示兒子英文名Luken，意思是「Bringer of Light」，又指BB早產令她相當緊張︰「上星期朝早突然發現BB有想出嚟嘅先兆，成個人變得好緊張，孭住走佬袋入醫院。」

想即刻生多個

Miki又說：「過程非常順利，無我想像中咁痛苦。生完嗰刻，我仲即刻講笑同老公講︰『咦！可以即刻生多一個喎。』」目前兩母子已出院返家，Miki笑說︰「依家返到屋企，每日都好忙，好多嘢要學！」

撰文︰李潔盈

編輯︰林梓添

設計︰K