腰傷繼續做運動 小齊打高球Keep年輕

林建岳從日本引入的高爾夫球品牌昨日於中環開店，邀請了任賢齊（小齊）、C AllStar及水原希子等出席開幕禮。本身有打高爾夫球的小齊十分重視落場裝備，笑言「球技唔緊要，裝備要一流」，不過已有一段時間沒有落場的他，因為腰傷關係不能進行刺激運動，但可趁機操練番高球。

小齊昨日在店內巡視了一會，發覺款式多又靚，笑言︰「巫啟賢曾經同我講過，打波裝備要一流，球技唔緊要。我同老闆又熟，搵佢置裝一定有折。」大學時讀體育系，主修高爾夫球的小齊又說，腰部受傷前有玩X Game，可是最近受傷患困擾，刺激運動還是可免則免，這陣子正好讓他重拾高球，他得戚表示︰「我同朋友打golf，感覺上自己都年輕咗，反而玩X Game，有車手細到直頭可以做我個仔呀！」問到腰傷情況如何？他說還未完全康復，所以行起來要就住。

老婆陪行紅地氈

談到小齊昨晚憑《樹大招風》角逐「亞洲電影大獎」最佳男演員，他笑謂為了隆重其事，之前特別訂製禮服，師傅日前才完工。問到家人會否捧場？小齊說太太Tina會陪他行紅地氈︰「成Team人行出嚟好有霸氣，（點解唔剪番戲中髮型？）有人提議過，不過太刻意又唔好。或者下個月金像獎拎埋AK47道具槍行紅地氈啦。」

採訪︰Pauline

編輯︰林梓添

設計︰K