關淑怡被捕 阿倫勸好友誠心改過

關淑怡日前涉嫌刑事恐嚇被捕，連日來大批傳媒在其愉景灣住所守候。之前每當她發生問題，好友曾志偉和校長譚詠麟（阿倫）都會出手相助，不過今次出事，阿倫也感無奈，認為有些事都要她自己去解決。

前晚阿倫出席晚宴時，提到關淑怡被捕，他說︰「我無佢電話，畀啲時間佢諗清楚想點。（傳佢出現財困？）佢啲歌咁有實力，有咁多歌迷、金曲，珠江三角洲有過億人聽廣東歌，佢要的起心肝。」阿倫也不願見到關淑怡放棄自己。

要靠自己面對

他直言不知對方有甚麼心結，更加不清楚她是否有事想不通，有傳曾志偉出手幫忙，阿倫謂︰「係啦，話晒志偉係佢『老竇』。」也有傳她連志偉電話都拒接聽，阿倫都指無辦法，問到會否勸對方努力工作？他說︰「唔係今時今日，咁長遠嘅日子要識自己照顧自己，唔可以靠身邊人提點自己，要自己面對。」那他是否好擔心？阿倫坦言所知的全都是聽回來，孰真孰假都不知道，所以沒有擔心不擔心。

問到演藝人協會可會幫助？阿倫表示︰「問會長啦，曾經同佢（關淑怡）講過唔使咁騰雞，傳媒係朋友，唔係個個對你唔好，睇嘢角度要扭正啲。（有傳酒店將佢間房Cut水電？）唔需要，叫佢走咪得囉，使唔使係門口搵煙攻佢？」阿倫希望事件盡快平息。

撰文︰Pauline

編輯︰林梓添

設計︰K