千嬅拉攏 「華星三寶」開戲

楊千嬅昨早到迪士尼樂園參加聯合國兒童基金會慈善跑活動，十公里的賽事結果以約一小時跑畢全程。此外，近日有報道指當年華星三寶（千嬅、陳奕迅及梁漢文）有意再合體，千嬅承認確有傾過，不過並非唱歌，而是想拍一部電影做紀念。

對於「華星三寶」有意合體，楊千嬅說︰「喺聚會時有同Eason（陳奕迅）、Edmond（梁漢文）傾過，想做啲有建樹嘅嘢，成日想做隻合唱歌，弊在大家唔同公司，Eason話返去諗，點知諗咗幾個月就改諗拍戲，我哋傾咗不如做《三成故事》，講下香港情懷，正能量嘢，不過乜都做三成，片酬就收足。」

跑到滿身大汗的她，完成賽事後要先到酒店沖涼才返現場受訪。她笑言︰「人到中年怕攝親，天氣潮濕，又怕氧氣唔夠，我都差啲唞唔到氣，天氣唔好都唔敢太發力，怕哮喘復發。」千嬅笑謂賽跑時赫然見到不遠處的烏雲，就用盡所有力量向前衝︰「好似跌咗銀包追賊咁快呀！」

女人30要緊緻

提到早前有指千嬅疑似有喜，她帶笑表示︰「我都想，邊有咁易。」反而她透露成功減了三磅。她解釋因為去年工作辛苦，過年時就喪食，連老公丁子高都取笑她肥，千嬅乘機呻︰「佢雙重標準，有時話驚我企喺余文樂旁邊已經似家姐，萬一似大媽仲大鑊。不過佢有時又猛咁叫我食嘢，提醒我要保重身體。」已年過40的千嬅表示，女人30歲後要緊緻，只要肚皮緊緻，就算着bra top都無問題。

撰文︰Pauline

編輯︰林梓添

設計︰梁政敏