唔怕跌入舞台陷阱 軒仔暗寸王菀之好肉地

張敬軒和王菀之（Ivana）前晚為本月16至19日舉行的紅館騷排練，對於首次在紅館開四面台，Ivana擔心誤踩舞台陷阱，幸好與導演早有共識，會透過耳機提醒她。

Ivana笑罵軒仔如果見到地下有窿都不會告知她，反被軒仔笑她就算跌倒亦不怕，因她「好肉地」能自我保護。Ivana就話演出時做手勢，導演就知道她蕩失路。

情人節唔使開工陪老公

今日是情人節，軒仔和Ivana豈不是要一齊度過？二人立即耍手擰頭，Ivana說︰「14號唔使排練，因為要各自扮靚，（即係可以同老公慶祝？）嘻嘻！」早前她透露排舞傷及舊患，軒仔可會加倍照顧？誰不知軒仔竟謂︰「唔會！」然後笑笑說︰「佢有專人（老公Eric So）照顧，唔使我擔心！」問Ivana是否已康復？她坦言時好時壞，不過導演很貼心，準備了針灸及清補涼等用品。

軒仔談到今次演出的造型說︰「會轉六個髮型，都幾開心，呢個騷好似返去啱啱出道，有好多回憶。」Ivana指軒仔始終是同一個張敬軒，沒有變壞。軒仔卻取笑Ivana變了少婦，每天排練後也趕着回家︰「好煩、好冤氣，每日都話要買餸，燉牛肉畀老公食。（你走漏眼？）我直頭跌眼鏡，我都食過佢煮嘅嘢，都好好，星級㗎。」Ivana笑言不好吃也不會拿出來，又慫恿軒仔出錢包伙食，軒仔一口拒絕，笑言︰「叫外賣好過！」

撰文︰Pauline

攝影︰林良明

編輯︰林梓添

設計︰梁政敏