朱千雪密密接job交學費

朱千雪與張彥博昨日到將軍澳出席商場聖誕活動，雖然昨日天氣轉涼，加上活動在戶外舉行，但千雪只穿單薄透視裙上陣凍到震，仍然落力玩遊戲，十分搏命。千雪笑言已接下不少新年商演活動全力搵錢，「我要留番嚟出年交學費！」

千雪昨日與張彥博齊齊玩掟雪球遊戲外，今年因劇集《EU超時任務》而人氣急升的她，更即場獻唱劇集主題曲《最真心一對》。千雪現正就讀法律碩士課程，她說：「我依家拍緊《踩過界》，好感謝監製遷就我喺放假時間拍劇，希望每年冬天同暑假都接到劇，一路有劇集出街。」趁假期頻頻搵真銀的她，坦言大學學費昂貴，「我想同時報多幾個學科，咁就可以快啲畢業。」

穿律師服打籃球

提到聖誕節，千雪自言在工作中度過。「聖誕嗰日我哋拍緊劇，咁啱拍攝場地隔籬係籃球場，我同王浩信、張振朗、蔡思貝趁空檔，着住律師戲服打籃球，過咗個好有活力嘅聖誕。」她坦言球技麻麻，「我好少打籃球，多數跑步，不過我着住高踭鞋打波，冇拗柴已經好叻！」同場的張彥博近排工作忙碌，接下不少活動之餘，更要拍攝幾部劇集。

採訪：李潔盈

攝影：Lego

編輯：黃寶恩

設計：李明