23場跨年騷紅館開鑼 學友笑認逼老婆撑場

23場《A CLASSIC TOUR學友‧經典世界巡迴演唱會》香港站前晚於紅館揭開序幕，學友整晚演出完美無瑕，獻唱40多首經典歌曲，最後以《如果愛》畫上句號。

張學友今次個唱跟之前北京站有少少不同，為fans帶來新鮮感。他演繹多首經典歌包括《離開以後》、《一千個傷心的理由》、《只想一生跟你走》、《我等到花兒也謝了》、《吻別》、《每天愛你多一些》、《Amour》等等，其中當他演唱初出道即爆紅的《情已逝》時，全場觀眾起立，聽得相當陶醉。

自爆歌酬增加

完騷後學友接受訪問，他表示返到香港開騷有點緊張，覺得自己的表現有80分，被扣的20分是一些細微位需要再執下。學友全晚換了多套衫，舞台設計也相當華麗，問到製作費花了多少錢？學友沒有正面回答，只表示：「成個Tour好長，會成個台跟住搬，真係唔知幾多錢，但係好多謝主辦單位，放晒手畀我去做，所有我講嘅嘢，除非技術上做唔到，其他都做到晒。（有冇減歌酬？）咁又冇，仲多過之前好多！」

相隔五年再在香港開騷，不過他沒有諗住破紀錄，最緊要做得開心，始終需要好多體力。學友表示返到香港主場，很開心觀眾反應熱烈，內地歌迷則較喜歡跟着唱歌。

問到家人可有捧場？學友說：「媽咪嚟咗，小朋友因為返學就冇嚟。（太太會嚟撑場？）佢都會嚟睇，當然係我逼佢嚟啦。」

撰文：Pauline

編輯：黃寶恩

設計：李明