黃子華養完狗考慮養人

愛心滿瀉的黃子華，最近家中多添一位新成員，就是一隻流浪狗。他多年前曾養狗，惟近年忙於工作，無暇陪伴牠們，直到最近在朋友要求下決定再養狗；至於下一步會否考慮養人，男神笑言不排除有日行山遇上紅孩兒，緣份之下帶他返屋企喎！

黃子華昨日到中環元創方出席支持領養寵物活動，今次適逢他的朋友做搞手，子華不諱言：「唔收錢都要嚟支持。」子華表示多年前曾經養過大種狗，心目中亦有名種狗想養，但作為一個負責任的狗主，他諗了兩年多都未有決定。直到早前行山遇到一隻流浪狗BB，他說：「見到佢好慘，仲要un un聲，嗰一刻好想帶佢返屋企，同時亦打破咗我想買（狗）嘅心態，到第二日拎晒袋同蘋果，點知搵唔番佢。之後有個朋友又有另一隻流浪狗，問我養唔養，今次我決定帶佢返屋企，依家我同佢係互相適應緊，都兩、三個禮拜喇。」

養寵物要有愛心

子華亦表示本身是養狗專家，只是近年忙於工作，無暇照料牠們。問到子華既然可以再養狗，那又會否考慮養人？他笑言：「廿年前我提議人，不如去保良局，有能力就助養或者領養，養人需要嘅愛心更大，想生仔不如領養一隻狗先，養狗都好大挑戰。」再追問他是否試試先養狗後養人？子華即表演其棟篤笑本色，笑謂：「緣份嘅嘢好難講，可能有日行山，有個細路好似紅孩兒咁樣，走埋嚟叫我Daddy，咁咪帶佢走囉。」

採訪：Pauline

編輯：黃寶恩

設計：梁政敏