爆Kay陀B女後換口味 張繼聰樂意做外賣仔

操得一身fit爆肌肉的張繼聰，昨日獲友人投資的健身中心邀請擔任剪綵嘉賓，穿上貼身衫的阿聰表示為劇騷肌以來已走上「不歸路」，所以每日keep住做gym。而愛妻心切的他，在老婆謝安琪（Kay）懷孕期間更不惜化身外賣仔，為老婆隨時送上不同美食。

張繼聰練得一身健碩肌肉，但站在一眾「大隻仔」身邊也自愧不如。司儀問他最滿意身體哪部分時，阿聰笑言：「各方面都滿意，除咗個樣，老婆當然喜歡我嘅性格啦，雖然佢陀住BB，口味方面有少少變化，好彩對我就無變。」

受訪時，阿聰表示之前拍劇要長時間keep住身形，每餐都幾乎食白烚雞肉，現在也不敢太放肆，盡量吃得清淡，他說：「每日都會做gym，就算半夜收工無時間做，都會舉啞鈴。至於飲食方面，打邊爐、汽水都唔會掂，或者等個女出世後，咪食半個即食麵慶祝囉！」

限制老婆每周一次甜食

阿聰又指Kay懷孕後，飲食習慣也改變了，他自言間中都會人肉外賣，收工後買太太喜歡食的東西給她，又或者與太太拍拖逛超市，他說：「孕婦要小心飲食，佢鍾意食甜嘢，不過我會克制佢，每個禮拜只可食一次。」

同場的名模Jocelyn和老公Anthony表示，有空就會做gym，Anthony更有教授健身，並鼓勵女士做gym保持完美綫條。Anthony剛於19日生日，問他們怎樣度過？Jocelyn表示當天相約朋友BBQ慶祝。問她送甚麼禮物給老公？她笑言買了一隻價值過萬元的手錶。

採訪：Pauline

攝影（部分）：林良明

編輯：黃寶恩

設計：梁政敏