趙學而開騷喊足兩晚

趙學而一連兩晚在九展舉行處女個唱，前晚順利完成尾場演出，她在台上說話不多，但連續唱出多首代表作，並以《尋開心》為演唱會畫上句號。對於出現甩嘴情況，她笑言：「唱Live就是有很多突如其來嘅事發生，我覺得幾好玩。」

趙學而翻唱了《偏偏喜歡你》及《我說過要你快樂》等經典歌，可惜當她唱到《輸給戀愛的女人》時，兩晚都出現甩嘴，她不甘心表現失準，故即時要求重唱，獲觀眾拍掌支持。前晚，學而笑言要飲啖水定一定，又除掉高踭鞋，她表示：「開始有少少腳震，我對腳已經夠幼，好驚拗柴。」臨尾飈完高音更笑說：「成晚得我一個，想唱死我咩！」她更稱原來真的會「發台瘟」，又大讚歌迷好愛錫她。

台下點唱《皆大歡喜》

完騷後，學而在後台開香檳慶功，她表示有好多歌曲改編後，跟原本有分別，亦因此而甩音幾次。她說：「我鍾意做（唱）細場，同觀眾有connection，好開心觀眾真係跟住一齊唱。」學而唱到《你是你本身的傳奇》時即忍不住爆喊，哭着說：「我真係冇鬼用。」她解釋每次唱這隻歌都會忍不住喊，就算在band房綵排時都會喊。

此外，問她為何不答應台下粉絲要求唱《皆大歡喜》？她解釋：「個騷係唱片嘅歷程，唔係電視劇歷程，況且呢個係古裝劇，唔係呢個時代，你哋返回現實啦！」又笑稱觀眾買咁貴飛入場，無理由想聽《皆大歡喜》呀！

撰文：Pauline

攝影：Lego

編輯：陳禮恒

設計：梁政敏