搞舞台劇無錢賺 馬浚偉喊住謝幕

由馬浚偉（馬仔）投資的舞台劇《偶然·徐志摩》在演藝學院公演六場，前晚終告圓滿落幕，馬仔為了這個舞台劇可謂費盡心思，不但沒有錢賺，過程中所經歷的辛酸令他喊了幾次。

馬浚偉、萬綺雯（蚊蚊）及羅敏莊（Mimi）等，前晚完成尾場演出，馬仔謝幕時一度淚灑舞台，更感染埋身旁的蚊蚊。馬仔坦言今次搞舞台劇沒有錢賺，他表示：「雖然六場爆滿，但因為成本太高，打成平手已經好叻，唔使蝕已經好感動，基本上係冇錢賺。」

馬仔回想起當日搵蚊蚊、Mimi及投資者傾今次演出，過程中受到好多考驗，他直言：「曾在街喊咗幾次，問自己搞嚟做乜？不過依家嘅興奮證明係值得。（演出超時要罰錢？）好似一晚罰我萬幾元，舞台劇係自己對藝術嘅興趣，惟有喺其他工作賺番錢，我將會籌備音樂劇，夾到期一定預埋蚊蚊同Mimi。」馬仔又透露目前正安排《偶》劇巡迴演出，最快明年年底實行，他希望每年都有一個屬於自己的作品，不一定參與演出，或考慮做編劇。

蚊蚊老公低調捧場

蚊蚊老公陳十三也有捧場，對於馬仔在台上喊住謝幕，她笑言：「本來11點就走得，但馬仔晚晚企喺度喊，一滴眼淚一萬蚊呀！」這邊廂完成舞台劇，那邊廂蚊蚊隨即埋位為新劇《致命復活》宣傳，明年1月也會投入演出舞台劇《我和春天有個約會》。

撰文：Pauline

攝影：Lego

編輯：林梓添

設計：梁政敏