吳啟華拒與前妻復合

吳啟華和前妻石洋子在2014年離婚，然而二人的關係並沒有變僵，反而因為有個女兒，偶然還是會一家三口相聚。早前啟華和前妻一同到外地旅行，令外間都以為他們復合有望，不過啟華卻樂於做隻無腳雀仔，揚言一定不會復合。

吳啟華、陶大宇、蘇永康及監製鄧特希等昨日出席無綫外購劇《隱世者們》飯聚。近日忙於拍內地網劇及網絡電影的啟華，坦言拍網劇時間短且酬金不俗，要是遇上好劇本也樂意參與。有指他密密賺豈不是可以買樓？他笑言在內地及香港都有物業，反而想在外地置業，事關他有意送女兒到外地讀書，要是有物業，也方便在彼邦陪女兒。問他捨得個女離開身邊？他說：「我陪佢囉，所以要努力搵錢，依家讀緊小二，希望佢完成小學先過去。」

《隱世者們》節奏快

談到他與前妻石洋子結伴旅遊，令人聯想到他們之間有望復合，啟華表示：「不嬲都冇乜（溝通），好少聯絡，（冇彎轉？）唔係好想轉，慣咗單身，好舒服、自由。」他透露即晚飛往北京，都會與前妻及女兒相聚，而他目前仍很享受拍散拖，「怕束縛嘅感覺，當穩定落嚟又發覺有好多問題，咁煩！我係浪子嘛，而且經歷過兩次婚姻，發覺家庭搞唔掂，依家咪幾好。（有冇叫前妻搵番個伴？）冇刻意，等佢自己發展啦。」

大宇和蘇永康則希望《隱》劇可以添食，過去曾參與拍攝鄧特希製作的劇集《壹號皇庭》和《妙手仁心》的蘇永康就大讚：「好多新一代嘅觀眾因為呢套劇再翻睇《壹》和《妙》，鄧特希拍劇風格係一句廢話都冇，所以觀眾睇《隱》覺得節奏好快，冇不必要嘅沙石。」

採訪：Pauline

編輯：林梓添

設計：梁政敏