馬明改劇本咀香香失敗

馬國明與新劇《為食神探》一眾演員昨日出席宣傳活動，劇中與岑麗香有感情綫的馬明，笑指曾改劇本硬加咀戲，但最終失敗；香香則回應與男友在泳池鴛鴦戲水十分正常。

馬國明與岑麗香、黃心穎、江欣燕及鄭子誠等出席TVB劇集《為食神探》舉辦「為食求愛三點三」宣傳活動，眾人在活動上大玩遊戲，當馬明和香香狂啜同一杯飲品時，神不守舍的馬明竟將飲管跌到褲上，而且位置非常尷尬，馬明即時拿紙巾印乾弄濕的位置；而鄭子誠和江欣燕互餵甜品時，江欣燕直指自己將匙羹放得太入，隨後更大講有味笑話：「好耐冇試過有人擺得咁入喇！」令人捧腹大笑。

自認製作成本低

劇中與香香有大量對手戲的馬明，被問到可有試過提出加咀戲？馬明笑言：「有改劇本，但唔奏效，我冇一次係成功。（下次咀男人？）唔好喇！」對於劇集收視為23、24點，馬明表示：「夠㗎喇，始終呢套係低成本製作，唔少朋友睇完都話好笑。」

而早前被拍到與男友強強在台灣酒店泳池舉止親暱的香香，強調穿比堅尼與男友游泳十分正常，她更笑言：「影相嗰個人應該埋嚟同我哋一齊玩。」