《城寨》結局宴獨欠「拳佬」 定欣爭視后：言之尚早

胡定欣昨晚與伍允龍、王君馨、劉佩玥及歐瑞偉等出席劇集《城寨英雄》結局聚餐，筵開六席，由「龍成虎」伍允龍爭贏「萬歲」，但「拳佬」陳展鵬因不在港而缺席。定欣飾「刁蘭」一角表現出色，被讚今年會是她和《巨輪II》的好姊妹田蕊妮再爭視后。

《城寨》成績突出，有傳會開拍《城》電影版？定欣坦言十分期待：「都期待㗎，個個演員放晒聲氣話想拍，希望可以原班人馬。（劇中多個演員死晒喎？）到時劇本就係全新。」

王君馨拍玉背廣告有市場

對於外界指年尾是她和田蕊妮爭視后？定欣表示言之尚早：「仲有幾個月，好開心同阿田惺惺相惜，當然有獎係錦上添花。」

王君馨飾演的「花曼」曾在劇中露出白滑背部，引來外界激烈回響，君馨昨晚自爆有公司邀她再次露背，她說：「佢哋話覺得我背脊好靚，叫我拍個背部廣告，淨係露個背，原來我背脊咁值錢。（考慮拍寫真？）咁可能花曼或者朝霞去拍仲多人睇。」對於陸永女兒日前看見花曼死去一幕哭得死去活來，君馨表示：「我有喺網上拍片安慰佢，小朋友好純真。」而袁偉豪透露憑《城》劇的帶挈，有不少公司邀請出席商演活動。

至於劉佩玥和伍允龍這對緋聞情侶，被問到拍畢該劇後可有令感情昇華？劉佩玥承認：「都有默契，始終對咗三、四個月。」此外，問伍允龍在舊愛鍾嘉欣誕下女兒後可有致電祝賀？他表示：「未，等佢搵我先，可能佢休息緊。」

採訪：Pauline

撰文：倪小珊

攝影：Lego