Eason自爆 當年似張德培

已休息一段時間的陳奕迅（Eason），昨日以香港網球總會大使身份，出席在維園舉行的「賽馬會樂動網球計劃」，冇見一排的Eason明顯瘦了，他亦謂這陣子重拾做運動的心情，希望身體健康，他笑言都想女兒康堤多做運動。

Eason在活動中與幾位小朋友交流打網球心得，他表示愛上打網球是受到林子祥和張學友影響，更與Eric Kwok及梁漢文是「波友」，今年暑假更重拾球拍。「以前鍾意踢波，但自從十字韌帶受傷，加上男仔踢波，落到場一定會過火，所以少踢咗。（個女有冇一齊做運動？）佢好懶，有時阿徐（太太徐濠縈）會帶佢一齊跑步，通常手長腳長腰長啲人都好懶。」談到他明顯清減了，他說其實磅數都是介乎170磅左右，但是肌肉結實了和去水腫，看起來確是比之前瘦，他說：「我都42歲，做運動唔係為咗外形，主要想骱位靈活啲。（你班好友都做運動。）係呀，雖然大家玩嘅運動唔一樣，不過會互相感染。」

談到打網球，Eason又謂從小接觸最多，猶記得幾年前到維園欣賞一班網球明星如麥根萊和張德培打波，當時有人誤認他是張德培，他笑謂：「嗰次我揹住個背囊，加上頭髮分界又同佢差唔多，又真係有幾分似佢。又有次在更衣室遇到麥根萊，我就主動同佢打招呼，佢雖然態度看似冷淡，其實又無乜嘢。」

唔知囡囡要留學

另外，向Eason求證有指康堤將赴外國升學，他反問：「點解我反而唔知？依家佢讀緊間學校都好好，如果佢讀到咪繼續讀囉，佢又話唔辛苦，係難少少囉。當然，如果有能力送仔女去外國讀書都係好事，識朋友多啲又可以擴闊眼界，仲可以訓練佢獨立，不過唔急嘅，等佢到中三、中四再決定啦，我都想佢喺香港識多啲朋友先。」

問Eason最近可有探望仍在瑪麗醫院休養的陳子聰？他突然醒覺：「唔記得探佢𠻹！不過佢情況已經好好多。」

採訪：Pauline

編輯：林梓添

設計：招潤洪