合唱新歌《兵兵》兩男爭一女 樂迷揞嘴笑坤哥輸畀Chilam 10條街

吳業坤（坤哥）早前邀得張智霖（Chilam）合唱新曲《兵兵》，兩代男歌手在MV中周旋於「娘娘」吳凱欣之間，未知鹿死誰手。坤哥在FB問網友會揀邊個，大部分樂迷熱捧Chilam完勝坤哥；有粉絲卻大愛坤哥平凡又可愛！

繼本月初的紅館處男個唱叫好叫座後，坤哥日前高調在FB發布新曲《兵兵》最新MV，力求keep住人氣。該曲以兩男爭一女為背景，剖白現今愛情世界娘娘四出收兵的社會現象。歌曲除了邀得林夕填詞，又找來「男神」Chilam合唱，他降呢與「毒男」坤哥在MV中齊齊向「民選港姐」吳凱欣展開追求攻勢，可謂非常畀面。

以毒男形象行走江湖的坤哥，繼續化身愛情世界中的兵仔，陪伴吳凱欣煲劇、打機兼食麵，他又表演用筷子夾蛋糕「食好西」，冧得女方笑逐顏開。另一方面，有型靚仔的Chilam則化身講究生活的「筍盤」，夥女主角燭光晚餐歎紅酒，並送上頸鏈，浪漫指數爆燈。

Chilam睇好坤哥變歌神

MV中，兩代歌手爭做暖男，期望贏得娘娘歡心。不過，結局卻令人意外，Chilam與坤哥同樣在娘娘門外摸門釘，原來二人同是吳凱欣的觀音兵而已。

為了宣傳新歌，坤哥特地在FB分享，並問網民：「話我知你揀佢（Chilam）定揀我！」不少樂迷嘲諷坤哥未夠班；有粉絲卻鍾情坤哥，因他夠貼地易相處。不論網民的選擇如何，看來坤哥才是大贏家，Chilam就對這位樂壇「新人王」大笠高帽：「之前演唱會合作過兩次，合唱新歌就係第一次，我覺得佢係新一代嘅歌神。」

撰文：Steven、Pat

協力：陳子楠

編輯：黃寶恩

插圖：何樂

設計：Simon