共用一篋飛北京 翠如否認與Edwin同居

昨早無綫兩套新劇《巨輪II》及《幕後玩家》演員前往北京電視節，蕭正楠（Edwin）和翠如拍住拖抵達機場，被發現兩人只得一個行李箱，翠如承認去了男友家一齊出門，但就否認同居。

黃翠如和男友蕭正楠分別代表兩套劇出席電視節，兩人名正言順寓工作於拍拖。不過兩人一同抵達機場時，Edwin就拖住一個篋，而翠如就只拎小手袋，似乎他們的衣物都擺放在一起，問他們是否一齊由屋企出門，翠如即表示：「我今朝收工先去佢屋企。（以為你哋同居？）冇乜所謂啦！」被問到會否一齊行紅地氈？Edwin表示未知道是否有紅地氈環節，卻又煞有介事謂：「我淨係知道洪永城唔喺度，因為拍外景嚟唔到！」

翠如說他們都忙着拍劇，所以近日比較少見面。談到翠如有份拍攝十月開鏡的《使徒行者2》，問是否取代佘詩曼飾演「釘姐二號」，她耍手否認：「以我所知故事同上輯唔同，女主角亦都唔係我，我有份做啫。（驚同上輯有比較？）人物角色都唔同，但編審就同一個，我相信佢哋嘅功力。」

阿田：爭視后言之尚早

田蕊妮此行宣傳有份演出的《來自喵喵星的妳》和《巨輪II》，談到《巨》劇下星期一首播，對收視是否有信心？阿田也有留意最近播出的幾套劇皆收視不俗，希望可以承接威勢，問到可有信心重奪視后？她笑稱言之尚早。阿田又表示胡定欣今年有幾套劇收視口碑都好，故睇好她有機會冧莊。

撰文：Pauline

編輯：林梓添

設計：nc