超好玩 自燒自食串燒店

一般的串燒/鐵板燒/煲仔菜，通常落完柯打就坐定定等食，最近旺角一間新開串燒店，力推「自己串燒自己燒」，兼且食物賣相超萌，一路燒一路玩一路食，正！

這間串燒店因為想增加客人食飯時跟食物的互動，又見韓燒、港式BBQ都流行自己燒，於是有「自己串燒自己燒」的概念。每張餐枱上都放了一個日本入口的串燒gas爐，在上面裝了韓燒餐廳常見的抽油煙設備，讓客人可廚神上身自己燒，生熟度和調味都可以自己話事，有得玩有得食，不必擔心吃到一身油煙味。

迷你鐵板與煲仔

不單只自燒自食的gimmick對準年輕人鍾意有得玩的market，食物選擇都比坊間港式串燒店有心思，大路的豬牛雞海鮮蔬菜固然齊備，小店更有個好玩又好食的迷你鐵板及煲仔系列，一樣可以放上串燒爐燒。像窩蛋菜脯玉子燒，其實是住家菜菜脯炒蛋的變奏，最後吃到的蛋是滑是金黃或焦香，就要看你的功架。煲仔系列則有粗獷的川式麻辣牛骨髓、薑蔥廣島蠔等，鮮味盡鎖於煲仔內，愈燒愈入味。

飲品亦好玩，一款Fun Fun斟手工啤酒，客人可自己飲多少斟多少，按毫升收費；不好酒精的推介沙冰，口味好特別，竟然用自家煲的腐竹糖水、番薯老薑糖水同冬瓜檸檬水來做！難得味道少甜傳神、沙冰口感又夠幼滑，用來送熱辣辣的燒物，好夾。

烏龍燒

地址：旺角染布房街及白布街交界藝興大廈地下14號舖

電話：2336 7370

平均消費：$150

編輯：魏雋

設計：招潤洪