囝囝報小一李嘉欣唔會大包圍

沙田馬場昨日舉行《愛彼女皇盃》賽馬日，李嘉欣以大使身份出席。囝囝Jayden還有一年就升讀小學，嘉欣表示：「囝囝依家讀K2，要準備面試搵學校，希望搵到間適合佢嘅學校。」她認為最重要是學好中文。

李嘉欣的囝囝Jayden目前已五歲，她直言：「有好多人畀意見我，有人叫我要大包圍報十幾間（小學），但我就怕囝囝會混淆，所以只會專注揀幾間心儀嘅學校。（已有心水學校？）通常都係學校搵你，唔係你揀學校，都會搵兩、三間嘅，我最多都係搵三、四間，就算冇得揀都唔會冇書讀。」

當年嘉欣入讀傳統學校，老公就讀國際學校，她認為最緊要學好中文打底。問她會否考慮送囝囝到外國讀書？她坦言如果Jayden能在香港升學的話，都希望他多些時間留在身邊。母親節將至，嘉欣表示當日會孝順自己媽咪，之後才與家人食飯慶祝。希望囝囝送甚麼禮物？嘉欣說曾收過囝囝的圖畫或一些自製小禮物，部分至今仍收藏着。

蔡加讚分不清孖仔

此外，蔡加讚現身賽馬日，他表示一對孖仔Christian和Kameron已有三個月大，十分精靈，但兩兄弟太似樣，有時未必認得出。在家中會讓他們一個着藍色衫、一個着綠色衫，太太汪圓圓比較細心，而他會盡量記住孖仔的特徵。加讚又透露已幫BB改名，大孖叫靖天，細孖叫靖晨。

撰文：Pauline

編輯：陳禮恒

設計：梁政敏