紅磡新舊小食

去紅磡，只為去紅館睇演唱會？其實此區餐廳小店相當多，掃街也有不少選擇，有舊風味，又有韓風小食店，就如演唱會般多姿多采！

一味韓式炸雞

雖然韓風炸雞熱度稍降，但這間韓式炸雞外賣店，門外就不時有年輕人排隊。型格裝修，只賣一款韓式調味炸雞，無骨雞肉先炸香，再加韓國醬料及豉油等快炒，可選甜味或辣味，想要芝士再加五元。炸雞售價按size而定，每份25元起。

IM Chicken

地址：紅磡蕪湖街117號地舖

電話：從缺

長青豆漿粢飯

格局如一般上海老店，有時光倒流feel。豆漿滑溜有豆香，粢飯大份足料，糯米夾油條、肉鬆及榨菜等。坐低開餐，大可試埋油豆腐粉絲、酸辣雲吞、五香牛肉麵、榨菜排骨麵等，風味地道。

上海真真豆漿大王

地址：紅磡蕪湖街48號地下

電話：從缺

自創芝麻蛋白燉鮮奶

區內有名甜品店，自創多款甜品，最多人柯打芝麻蛋白燉鮮奶，其實是燉鮮奶蛋白crossover芝麻糊；溫馨提示先食燉奶，再到芝麻糊部分，最後拌勻一齊吃，三重享受。另合桃蛋白燉鮮奶、白芝麻雪耳杏仁露、金銀芋椰汁西米露等，都有新鮮感。

芝蔴綠豆甜品屋

地址：紅磡黃埔新村民泰街16號B地下

電話：2330 7978

西班牙油條配雪糕

來自韓國大熱的甜品「Churros雪糕」，即Gelato加上西班牙油條Churros，一冷一熱好過癮。Churros全部即叫即做，外脆內軟，撒上肉桂粉，好好味，還有新口味七彩朱古力、花生榛子朱古力及綠茶朱古力等；而Gelato夠軟滑，奶味香濃，兩者合體，好有火花。單買Churros或雪糕都可以。

eyescream & Churros

地址：紅磡德民街29號德民大廈地下B1舖

電話：從缺

編輯：魏雋

設計：Simon