北上拍戲分開1個月 杏兒爆老公有怨言

胡杏兒和老公李乘德（Phil）歡度蜜月歸來不久，隨即重新投入工作，兩人在聚少離多下，Phil亦忍不住似要說誨氣話。杏兒為了安撫老公，承諾完成新片後放長假，更默認趁機造人。

胡杏兒昨日出席彩甲油發布會，身穿火紅色連身裙的她一臉幸福，但她在活動後要趕飛往蘇州拍喜劇新片《我為車狂》。

杏兒表示要一個月後才返港，問到老公會否前往探班？她估計拍攝到中段可能會，又自爆老公已開始有點唔捨得：「佢會講『快啲煮埋餐飯畀我食啦』、『攬多一次啦，唔知幾時可以再攬住你』呢類說話，搞到我都好唔捨得，所以拍完呢部戲會放一個長假。（趁機造人？）唔知㗎。」

過去生活枯燥

此外，鄧健泓日前在ViuTV節目《晚吹－總有一隻喺左近》上大爆當年在TVB試過被導演出賣，對方已離職，杏兒聞言後表示：「印象中我未同呢位（所形容）導演合作過，雖然我唔知講緊邊個，我都想八卦下。（會否考慮上節目爆料？）唔會啦，我都無嘢爆，過去在TVB嘅生活真係好枯燥，總之嗰時好忙碌，但係愉快嘅。」

採訪：Pauline

攝影：林良明

編輯：陳禮恒

設計：梁政敏