靚靚嫌Chilam送禮慢動作

袁詠儀（靚靚）和張智霖（Chilam）一向恩愛，Chilam常送名貴首飾冧老婆，但靚靚卻踢爆老公買完禮物並不是火速送上，快則等一星期，有時慢起來遲足一個月。

袁詠儀、姚書軼昨日出席「點滴善心珠寶慈善拍賣」預展，拍賣將於下月12日舉行，部分收益將撥捐「點滴是生命」作慈善用途。靚靚即場佩戴逾300萬的鑽飾，她希望拍賣活動為山區居民籌錢興建水窖和學校，助他們脫貧。

生B冇獎勵

Chilam閒時也有送禮物給靚靚，多數是保值的手錶和鑽石等，她笑謂：「佢有送過百萬鑽飾，但要我講好多年先肯送，好似唸大悲咒咁，不停向佢明示又暗示。（生BB時送甚麼給你？）佢話已經送咗個仔畀我，所以乜都無，我都費事再提。」

靚靚又笑言根據過往紀錄，心頭好最快也要等一星期才能到手，慢的話，即使每天唸經都隨時再等一個月。此外，問她將來會否把首飾贈予未來媳婦？靚靚即笑言：「都要睇下佢對我個仔好唔好，好就畀佢囉。」

撰文：Pauline

編輯：陳禮恒

設計：nc