教女Sofia勿浪費 梁詠琪成食物焚化爐

梁詠琪（Gigi）的女兒Sofia轉眼間已一歲，身為媽媽的Gigi在教育女兒方面肩負起很大責任，近年頻頻出席環保活動的她，也身體力行做好榜樣，盡量教女兒不要浪費食物，笑言Sofia食剩的東西都由她和老公鯨吞吃清光。

梁詠琪昨日出席港台《天人合一2016》環保節目啟播禮，席上跟中、小學生分享由他們設計的「升級再造」藝術品，Gigi坦言在家甚少開冷氣。「其實着件短Tee加短褲，瞓覺唔蓋被就覺得好舒服，有時仲會凍。我亦會教囡囡唔好浪費食物，會講解好多小朋友無嘢食，佢就會好快食晒，當然有時會食剩，我同老公就食埋，所以有咁嘅身形不無原因。」Gigi亦會接收朋友的二手小朋友衫，還會將Sofia的衫仔轉贈給朋友，盡量減少浪費。

提到李心潔快將臨盆，Gigi表示已準備了衫仔給孖仔，問到可知道心潔是否很緊張？她笑言：「又唔太緊張，不過我就好開心，因為遲啲有兩個小朋友同Sofia玩。」

盼解決版稅問題

此外，環球與無綫就版權稅問題未達到共識，有指Gigi將於下月在無綫慈善節目中獻唱《花火》，卻礙於該曲版權由華納擁有而未能成事。Gigi表示：「咁咪唱多首新歌囉，反正就快出新碟。其實網上版權都磋商咗十年，我認同版權應該尊重，如果真係要唱咪畀錢囉，講到尾，最大損失都係觀眾。」

另外，Gigi最近應好友古巨基邀請，出席對方擔任導師的內地節目《星動亞洲》，二人合唱了多年前曾演繹的《許願》，令觀眾十分回味。

採訪：Pauline

攝影：林良明

編輯：林梓添

設計：鄧俊明