一齊捧麥當娜開騷 蔡一傑惋惜羅明珠驟逝

昔日「開心少女組」成員羅明珠於上周五心臟病發猝死，消息震驚整個娛樂圈，草蜢的蔡一傑在明珠離世前曾跟她見面，對於好友突然離世感到惋惜。

草蜢三子前晚出席《萬眾同心公益金》，與一班學生演繹歌曲《完美》。剛拍完主打歌《大作》MV的他們透露共花了14小時拍攝，蘇志威更出動私伙新衫上陣，但當他眼見工作人員在新衫上滴蠟便感到肉赤。

談到好友羅明珠突然離世，蔡一傑表示對方今年有出席他的生日會，睇到新聞很不開心，他說：「明珠性格開朗，之前佢約咗我宣傳後飲嘢，一月時又同佢去澳門睇麥當娜，今年見過佢兩次，突然離世好可惜！」

蘇永康一語成讖

同場的蘇永康則表示最後一次見明珠時，是對方首次見他老婆。他謂：「好突然，之前去大酒店（殯儀館）送別杜惠東先生，嗰時我同啲同輩朋友講：『依家仲係送緊啲長輩，整整下就要送同輩』，點知真係咁……」蘇永康表示希望朋友保重身體，自己亦會加倍留意健康。

另外，王灝兒（JW）前晚亦有出席任表演嘉賓，提到與舊老闆黎明同場，她表示有跟對方打招呼，並謂之前去看黎明演唱會與他緣慳一面，她又透露與衞蘭稍後會一齊開騷。

撰文：Pauline

編輯：林梓添

設計：鄧俊明